CHITARRA & CANTO

 Dis altyd aangenaam om van ons eie Suid Afrikaanse uiters begaafde en talentvolle  kunstenaars, wat in die verlede al  in Stilbaai opgetree het, weer terug te verwelkom. En dit was die geval met die Musiekvereniging se Gala-konsert van 24 November, waartydens Linette van der Merwe en Jonathan Moolman opgetree het. Die soet, helder en soepel klank van Jonathan se akoustiese kitaar in kombinasie met Linette se vol, ryk messo-sopraan stem, het die regte atmosfeer vir 'n genotvolle aand geskep . 

Die interessante program het bestaan uit ‘n  verskeidenheid van items -  van meer klassieke liedere  en arias, waaronder die pragtige Come again (Dowland),  Lascia ch’io pianga (Hӓndel)  en Seguidilla (Bizet) tot gewilde liedjies uit musiekblyspele, wat onder andere die gewilde Summertime (Gershwin), Can’t help lovin’ that man (Loewe)  en Somewhere over the rainbow (Arlen & Stothart), ingesluit het.  Linette se  uitstaande tegniese vaardigheid, vermoë om kontraste tussen ligte en dramatiese styl af te wissel, goeie asembeheer, uitstekende diksie en fyn aanvoeling vir vertolking, ondersteun deur Jonathan se uiters simpatieke en briljante musikale kitaarbegeleiding, was duidelik waarneembaar. Opmerklik was ook die fyn musikale aanvoeling tussen die twee kunstenaars.

Gedurende die vier solo kitaar-items, waaronder  Salt water (Lennon), Recuerdos de la Alhambra (Tarrega), Blue Moon (Rogers & Hart) en El Noi de la Mare (Tradisioneel) het Jonathan se besondere musikalliteit, meesterlike speeltegniek en aanvoeling vir die kitaar as instrument, het duidelik na vore gekom.  

Na ‘n welverdiende staande applous, is die aria Habanero uit die opera Carmen (Bizet) skitterend as toegif aangebied.

Welgedaan Linette en Jonathan!

Nina du Toit