Luca Ciarla het ‘n baie interessante program : “Fiddler in
the Loop”, vir die Stilbaai Musiekvereniging aangebied. Hy het sy doktorsgraad in Amerika verwerf, waar hy in die
klassieke- en jazz style opgelei is – ‘n begaafde musikus wat iets baie
besonders en andersoortig aan ons gebring het.
Hy neem ten eerste sy eie agtergrond ritmes op met ‘n
“loop”-masjien en speel dan ander melodië bo-oor die voorafgaande ritmes in die “loop” - wat hy dan ook opneem.
Luca maak gebruik van verskillende soorte agtergrond ritmes – pluk
en ‘strum’ van die snare van sy viool ; jazz elemente wat hy opneem ;
voëlgeluide wat nageboots word ; verskeie temas in pizzicato-styl soos
byvoorbeeld “ My favourite things” uit Sound of Music. Na die ritmes neergelê is, word ander klanke en melodieë daarteen improviseer.
Selfs J S Bach se Engelse Suites en dansvorms (Gavotte, Tarantelle, Bourreé en Gigne) is as agtergrond-ritmes gebruik waarteen hy nuwe melodieë opgeneem het en so nuwe danse gevorm het.
Dit was vir die gehoor duidelik dat dit voorwaar intense
konsentrasie verg om sulke melodië en ritmes teen mekaar te laat
inpas.
Sommige Stilbaaiers het Luca Ciarla se aanbieding besonder
geniet. Ander het dit vreemd ondervind. Almal was dit eens, dit was beslis iets
totaal anders !
No comments:
Post a Comment