Op Saterdag 12 Oktober het die vrolike klanke van die Suid-Kaap Simfonie Orkes oor Stilbaai weerklink. Ten spyte van 'n koue wind en reën was die saal
vol met 'n entoesiastiese gehoor wat elke oomblik geniet het.
Die orkes bestaan uit 'n groot aantal jongmense wat saam
met hul ouer kollegas die voorreg en vreugde ervaar om so saam musiek te maak. Die entoesiasme en geduld van die dirigent was opvallend
en die toegewyde erns van veral die jong spelers was 'n besondere
openbaring.
Die aandag waarmee hul die dirigent dopgehou het, spreek
van konsentrasie en volle vertroue in hul leier - 'n waardevolle les vir almal
van ons wat graag iets besonders wil bereik.
'n Groot verskeidenheid van musiek is voorgedra. - 'n
meesleurende Strauss wals, die vrolike Can-can van Offenbach, die Eerste
beweging van Schubert se onvoltooide Simfonie, opgevolg met 'n keurspel van
bekende melodieë uit The Sound of Music. Musiek uit films was volgende aan die
beurt met verskllende James Bond temaliedjies en die program is afgesluit met
die ongewone ritmes van die tema musiek uit Pirates of the
Caribbean.
"n Genoeglike en leersame oggend van vrolike musiek wat
'n triestige Saterdagoggend omtower het.
No comments:
Post a Comment