Die Stilbaaise Musiekvereniging het weereens 'n treffer
aangebied. Die "Hongaarse Trio" het Maandagaand, 9 September, hier opgetree in
die Kerksaal-Oos. Die talentvolle musici, 'n violis Gabor Jeney, fluitspeler
Nerina von Mayer, en basviolis Donat Pellei, is al drie uitstaande musikante wat
almal al ere toekennings verwerf het. Al was dit 'n koue aand, het dit
Stilbaaiers nie weerhou om te kom luister en geniet nie.
Die program is saamgestel uit uittreksels en komposies
van verskeie klassieke komponiste asook moderne werke, meesal goed bekend.
Die program voor pouse het werke bevat van bekende
klassieke komponiste oa. Pacelbel, Mozart, Bizet, Strauss, Schrammel, Liszt en
Brahms. Na pouse is meer kontemporêre musiek, van 'n
ligter trant gespeel, soos Lehar, Hardiman, Gardel, Mc Hughey, Gade en Ravel.
Voor elke voordrag het Gabor breedvoerig iets van die
komponis aangehaal en verskeie interessante staaltjies vertel. Dit het bygedra
om die program soveel meer genotvol te maak.
Die program is ingelui met die Pachelbel Kanon
waar die pragtige inleidende tema op gevoelvolle manier deur Donat op die
basviool vertolk is. Die fluitspeler het veral die gedeeltes uit Mozart
se Towerfluit goed bemeester.
Van die ligter werke het ingesluit Green Sleeves,
Dreams, Jealousy Tango en Scent of a Woman. Gabor het veral
uitgeblink in sy spel van Jealousy Tango en was met hart en siel
betrokke. Die fluitspel van die Ierse Lord of the
Dance was besonder flink en treffend en het groot byval by die gehoor
gevind. Die program is afgesluit met 'n encore van
Andrew Lloyd Weber.
Dit was 'n genotvolle en ontspanne aand wat nog lank
onthou sal word.
Dr Marian Smit
No comments:
Post a Comment