Dit was die aanbieding van
die Stilbaai Musiekvereniging op 13 Julie 2013 – ‘n andersoortige program deur
David Scheel, die Australiese komediant pianis.
Staaltjies uit sy loopbaan as
konsertpianis het die gehoor by tye laat skater. ‘n Bekende volkswysie word in
die styl van komponiste soos Mozart, Tchaikovsky, Albeniz en selfs ‘n “swing
style” aangebied. Die bekende melodie “Memory” van Andrew Lloyd Webber en
“Jesu, joy of man’s desire” van JS Bach word gelyktydig gespeel – een hand
“Memory”, die ander hand “Jesu Joy”, wat ‘n fyn oor en fyn luister van waar watter
wysie is, vereis.
‘n Aantal van sy eie
komposisies was nogal heel aanvaarbaar: “Dance of the birds” was ‘n pas de duet
in tipiese balletstyl – hulle vlieg deur
die lug in sirkels en steel selfs ‘n soentjie! Die “Pastorale” uit sy Simfonie
in Gmin het in rustige sangerige styl, ‘n dag in die natuur mooi verbeeld. “In the
Fall” was ‘n blik oor die woude en die meer – ‘n spel van oranje, geel en bruin
herfskleure.
Vier persone uit die gehoor
gee elkeen ‘n noot op eie toonhoogte en hy bou daaruit ‘n redelik dramatiese
improvisasie stuk. Die bekende lied “Walzing Mathilda” word op humoristiese
wyse uitmekaar gehaal en met verskeie betekenisse uitgebeeld.
Ten slotte volg ‘n keurspel
van 22 bekende wysies wat dikwels deur die publiek versoek word – stukke soos
Für Elize, Blou Donou, Ronda alla Turka, Baby Elephant walk, Somewhere my love,
en verskeie ander. Ek kon darem die meeste daarvan herken!
Dit was ‘n humoristiese aand.
David Scheel sê na die uitvoering dat hy die vriendelike ontvangs en die
Stilbaai gehoor baie waardeer het.
Bettie Niehaus
No comments:
Post a Comment