Die kitaarduo, “Vivace” het op
26 Junie die gehoor van musieklief- hebbers op Stilbaai verras met hulle
besondere samespel en die pragtige klankkleur van die twee kitare. Die twee
jong kunstenaars van Pretoria, Jonathan Moolman en Gerrit Roos, het ‘n interessante
program met 'n wye verskeiden- heid aangebied.
Die eerste drie stukke op die
program, String Theory, Millie’s walk en
High Noon, is komposisies van Jonathan Moolman en is besondere uitbeeldings
van eie ervarings. Veral Millie’s walk, geïnspireer deur sy
hondjie, het groot byval gevind!
Die Concerto in D van JS Bach was ‘n oorspronklike komposisie van
Vivaldi wat deur Bach vir die klawersimbel aangepas is en uiteindelik vir twee
kitare verwerk is. Die hooftema word verdeel tussen die twee kitare wat dit
soos ‘n gesprek tussen twee persone laat klink. Die stukke deur MD Pujol het ‘n
Argentynse kleur met ‘n sterk tango-ritme. Die derde deel het, in kontras
hiermee, ‘n herkenbare dromritme afkomstig uit Afrika.
Dit was opvallend dat die
kunstenaars voortdurend op die musiek en op mekaar gefokus het, en nie op hulle
hande gekyk het nie. Tussendeur het hulle interessante inligting oor die musiekstukke
en die kitare verskaf.
Freddy Mercury se Bohemian Rhapsody, verwerk deur die twee
kunstenaars, is ‘n dramatiese lied vol emosie, en is uitmuntend deur die twee
kunstenaars vertolk. Concerning Hobbits,
oorspronklik vir die orkes geskryf, is baie interessant deur hulle verwerk vir
die kitaar: hulle gebruik ‘n tremolo-effek om die note langer te laat
klink, aangesien die kitaar eintlik ‘n “pluk”instrument is en nie gestryk kan
word soos met ‘n viool nie.
‘n Werk van Boccherini in Spaanse styl, wat
Flamenco volksmusiek simboliseer, het die gehoor bekoor. Die bekende tema uit
“The Deerhunter”, wat deur John Williams bekend gemaak is, was die perfekte
toegif om so ‘n heerlike aand met sulke talentvolle en sjarmante kunstenaars, af te sluit.
Almal is dit eens – dit was nog
‘n suksesvolle aand, aangebied deur die Musiekvereniging van Stilbaai.
Bettie en Louise
No comments:
Post a Comment