Die Kamermusiek Trio betaande uit Stefan Lombard (klavier),
François Luc Arzul (viool) en Niël Smit (Franse horing) – almal meesters van
hulle instrumente, het op 24 Mei ‘n baie spesiale program
aangebied.
Die program is ingelei met ‘n baie besondere stuk : ‘n Trio
vir Franse horing, viool en klavier. Daar was geen bladmusiek beskikbaar van
die stuk nie en Stefan en sy vriende het dit self neergeskryf na aanleiding van
‘n elektroniese opname. Hierdie groep musikante is tans die enigste groep in
die wêreld wat hierdie komposisie van die redelike onbekende komponis Duvenoy
uitvoer! Duvernoy was self ‘n bedrewe Franse horingspeler.
Die Sonate in E Min. vir klavier en viool is een van 35
sonates vir viool deur Mozart, en hierdie word beskou as een van die juwele vir
viool. Die tipiese kristalheldere toonkwalitiet van Mozart se
musiek, is mooi afgewissel met rustige en meer sombere gedeeltes. Die tweede
gedeelte (minuet) is in tradisionele dansstyl, vol trillers en ligte vrolike
klanke - wat Francois voortreflik uitgevoer het.
Die sonate vir Franse horing en klavier deur Beethoven, is ‘n
toonbeeld van die besondere klankkwaliteit van die horing, wat aanvanklik deur
jagters gebruik is! 'n Latere ontwikkeling was die “opgerolde” hol pyp, waar daar
met die hand in die kelk van die instrument, klanke gereguleer word. Die speeltegniek
van die Franse horing het verander sedert kleppe gebruik word om die toonhoogte
te beheer, tesame met die beweging van die hand/vuis in die kegel, om sekere effekte te bewerkstellig. Neil het bewys dat hy hierdie komplekse instrument heeltemaal bemeester het. Die ryk klank van Beethoven en die musiek se akkoorde, het
besondere ondersteuning van die pianis vereis en die begeleier was te alle tye
daar om die vloeiende, en soms sterk aggressiewe klanke, van die Franse
horing te dra.
Die Trio vir Franse horing, viool en klavier van Brahms het
ons geneem na die Romantiese tydperk. Die “Andante” het ‘n sterk
landelike atmosfeer geskep, met ryk akkoorde en sterk ritmes. In die laaste
beweging voel dit asof die verskillende instrumente mekaar rondjaag en lekker
gesinkopeerde ritmes ook voorgehou word. Die stuk het afgesluit met ‘n groot
uitbarsting van klanke, wat die gehoor op hulle voete gehad het.
As toegif, ‘n pragtige “chanson” van Rachmaninoff – ‘n
volmaakte afsluiting van ‘n aand van afwisselende klanke. Baie dankie aan hierdie drie uiters begaafde musikante. Julle
het ons siele gevoed !
Bettie Niehaus
No comments:
Post a Comment