Die Cape Town Male Voice Choir het Saterdagaand 9
September in Kerksaal-Oos opgetree - nog 'n uitstaande aanbieding deur die
Stilbaai Musiekvereniging. Die koor het onlangs teruggekom van London waar
hulle besondere sukses behaal het met hul optrede by die "Wales Choirs of the
World" konsert, as verteenwoordigers van Afrika. Dit het plaasgevind in die
Royal Festival Hall by geleentheid van die Olimpiese Spele in
London.
Die koor bestaan sedert 1976 en staan die afgelope 17
jaar onder leiding van Margaret Barlow en bygestaan deur die begeleier, Warren Patientia.
Die koor het die saal al singende ingekom met kerse
in die hand. Bekende liedere in die eerste helfte van die progam het ingesluit:
I Believe, Speed your Journey, Amazing Grace en 'n tradisionele Zulu melodie met
'n besondere bas solis, Serge Sabuc Sulu.
Na pouse was daar 'n welkome afwisseling toe 4 lede van
die koor opgetree het in 'n vertoning van 2 Barbershop liedere - iets uit die ou dae!
Die tweede helfte het begin met 'n baie besondere lied
uit Afrika - spesiaal geskryf vir die optrede in London. Dit het dele uit N'Kosi
Sikeleli Afrika bevat asook die bekende Plea for Africa met 'n baie besonderse
uitbeelding van 'n Hoëveldse donderstorm: Met "sh"-klanke, klap van die hande en die stamp van voete, het die weerlig en donderweer
geslaan en die reëndruppels op die dak gedreun!
African Trilogy het 'n samevoeging van liedere soos
Manguane Mpulele, Hey Moswale en ander tradisionele Afrika melodieë ingesluit.
Die immergroen Andrew Lloyd Webber se Love changes everything is op gevoelvolle
wyse deur die solis John Bolton voorgedra. Sweet Geogia Brown was 'n lekker
vrolike item en die program is afgesluit met die bekende When the saints go
marching in - 'n lied by uitstek vir mannekore! 'n Ware fees van musiek het ons
te beurt geval. Ek hoop Stilbaai se mense sal met 'n lied in die hart elke dag
tegemoed gaan - "Vrees niet waar weerklinkt een lied, slechten mensen singen
niet."
Bettie Niehaus.
No comments:
Post a Comment