Take Four Klavierkwartet 7 Augustus 2026

 

Wat ‘n onvergeetlike aand saam met hierdie vier welbekende, wêreldgehalte musikante! Zanta Hofmeyr, Jeanne-Louise Moolman, Susan Mouton en Elna van der Merwe het, soos altyd, ‘n uitvoering van nie net hoogstaande gehalte nie, maar ook musikale magiesheid gelewer.

Hulle het twee werke uitgevoer:   Johannes Brahms se diep emosionele en meesleurende Klavierkwartet nr 1 in G-mineur, opus 25 en Antonin Dvořák se intense Klavierkwartet nr 2 in E ♭ majeur, opus 87. Ons was bevoorreg om met hierdie twee werk bederf te word.

Die Brahms klavierkwartet is tussen 1856 en 1861 gekomponeer en is die eerste twee kere deur onderskeidelik Cara Schumann (1861) en Brahms self (16/11/1862) uitgevoer. Dit is geskryf vir Klavier, viool, altviool en cello met die volgende bewegings:

I.        Allegro

II.       Intermezzo: Allegro, ma non troppo

III.      Andante con moto

IV.     Rondo alla Zingarese: Presto

 

Die Allegro begin met ‘n unisone tema in kwartnote in 4/4 tyd in die klavierparty, wat na ‘n paar frases deur die cello oorgeneem word. Elna en Susan het dit in perfekte simbiose uitgevoer en die luisteraar voorberei op die intens emosionele musiek wat sou volg. Die tweede beweging het ‘n onderliggende dringendheid, met die cello wat feitlik deurgaans die toon aangee.  Die blitsvinnige uitdagende laaste beweging is met absolute presisie en vuur uitgevoer en het die gehoor asemloos gelaat

Dvořák se klavierkwartet is in die somer van 1889 gekomponeer en die eerste keer uitgevoer op 17/10/1890. Dit bestaan uit:

I.        Allegro con fuoco

II.       Lento

III.      Allegro moderato, grazioso

IV.     Finale: Allegro, ma non troppo

 

Daar is ‘n duidelike sin van drama en intensiteit in hierdie werk, wat, soos met die Brahms, meesterlik deur hierdie klavierkwartet oorgedra is. Die openingstema word deur die strykers gespeel, waarna die klavier dadelik daarop antwoord. Daarna vleg verskeie oorvleuelende teksture inmekaar. Die vyf pragtige temas in die liriese tweede beweging het beelde van ‘n rustige stroom tussen bome deur opgeroep. Die wye omvang van emosies is oortuigend en gevoelvol deur die musikante uitgebeeld.  Die derde beweging is tipies van Dvořák, gekenmerk deur volksmelodieë en -style, wonderlik gedra deur strykers en klavier.  Die laaste lewendige, vewikkelde wisselwerking tusse instruments is met oortuiging en intensiteit deur die musikante aan ons gegee. Dit het triomfantelik geëindig met weereens ‘n uiters waarderende gehoor.

Take Four is nou ‘n jaarlikse instelling hier op Stilbaai en ek sien met geesdrif daarna uit om hulle in 2026 weer te hoor.

Annelize Viljoen